للأسف من يومين، سمعنا خبر مفجع وهو وفاة ياسمين أحمد مؤسسة .baking and co بعد تعرضها لحادث. ياسمين كانت لسه في أوائل العشرينات، ومتجوزة وعندها بنت عندها سنتين وكانت مؤسسة لصفحة بتدي من خلالها كورسات بتعلم فيه البنات الطبيخ وكمان بتحط وصفات أكل علشان الكل يقدر يستفيد منها ويعملها في البيت.. فطبعًا خبر موتها المفاجيء كان صدمة كبيرة للكل، ولكن بعد رحيل الإنسان، العمل الصالح والسيرة الطيبة هي اللي بتفضل.
كل قرايبها وأصحابها نشروا بوستات علشان الناس تدعيلها بالرحمة والمغفرة، ولكن مش بس الناس القريبة منها هما اللي عملوا كده، ولكن حتى الناس اللي ماتعرفهاش زعلت على رحيلها وتعاطفت جدًا مع زوجها وبنتها وعلشان كده لقينا كتير من الناس بتسارع في إنها تشارك بطرق مختلفة في إنهم يحيوا ذكرى ياسمين، فبجانب الدعوات اللي حرفيًا وصلتلها من آلاف الناس سواء من زوجها، وأصحابها أو حتى من ناس ماتعرفهاش، في ناس تانية فكرت إزاي تقدر تقدم حاجة أكبر من كده ليها.
فانتشر بوست بيدعوا الناس إنهم يترددوا على صفحتها على الانستجرام ويستفيدوا من الوصفات اللي كانت بتقدمها علشان تبقى صدقة جارية والكل يستفيد من الحاجات اللي هي تعبت علشان تقدمها للناس، وكمان اتعملت صدقة جارية مالية على روحها شارك فيها آلاف الناس وعدوا الرقم اللي هما كانوا حاطينه خلال اليومين اللي فاتوا.. وكمان مؤسسة “لبلدنا” الغير هادفة للربح قرروا يجهزوا وجبات صدقة إطعام لياسمين يوم الجمعة علشان تبقى صدقة من نوع مختلف على روحها.
آخر كلمة: ربنا يرحمها ويصبر أهلها.
