النهارده الخميس بيوافق اليوم العالمي لسلاحف البحر، وهي زواحف بحرية جميلة ومتنوعة ظهرت على الأرض من أكتر من 100 مليون سنة ومن وقتها وهما بيعوموا في محيطات الكوكب من غير ما يحصل أي تغيير واضح على شكلهم أو طبيعتهم البيولوجية، ولكن خصائصهم دي ممكن تكون سبب في كونهم مهددين بالانقراض.
بيأكد علماء الحفريات والبيولوجيا إن مافيش غير 7 أنواع من السلاحف البحرية موجودة النهارده، رغم إن الحفريات بتوضح إن كان في منهم حوالي 100 نوع في العصور القديمة. متوسط عمر سلاحف البحر طويل جدًا ولكن نموهم البطئ، وتأخر وصولهم لمرحلة النضج، وبطء معدل التكاثر الخاص بيهم، بيخليهم معرضين لخطر الاستغلال بكل الأشكال.
انهارت أعدادهم خلال القرن الماضي بشدة حوالين العالم كله، والسبب الرئيسي في ده هو صيدهم المبالغ فيه علشان الأكل والجلود، وبسبب ظاهرة وقوعهم غير المقصود في شباك الصيد، وبيلعب تلوث المحيطات كمان دور كبير في الكارثة دي.
بيعيش في البحر الأحمر خمسة أنواع من سلاحف البحر، وتم رصد أربعة منهم على السواحل المصرية:
السلحفاة الخضراء
النوع ده من سلاحف البحر موجود في مياه السواحل المصرية سواء في البحر الأحمر أو المتوسط، وممكن يوصل طولها لمتر ونص، أما وزنها فممكن يوصل لـ 315 كيلوجرام. بتتغذى على اللافقاريات الصغيرة، زيّ قناديل البحر والإسفنج، وكمان على بيض الأسماك والطحالب والأعشاب البحرية. وصغار النوع ده من السلاحف مش بتاكل لحوم غير بعد ما توصل لسن خمس سنين.
جزيرة الزبرجد الموجودة في جنوب البحر الأحمر بيعشش فيها أكبر عدد من السلاحف الخضراء في العالم، وفي الغالب بتتزاوج السلاحف في أماكن بعيدة عن الأماكن اللي بتضع فيها البيض وبترجع الإناث لأماكن التعشيش ومعاها من 90 لـ120 بيضة خلال فصل الصيف علشان تعمل أعشاش البيض، ودي عملية بتحصل بشكل خاص خلال الليل.
بتضع سلاحف البحر بيضها مرة كل سنتين لـ 4 سنين، وبتصل السلاحف الخضراء لسن البلوغ عند عمر 25 سنة، وطبقًا للتقارير الرسمية، عشش حوالي 600 سلحفاة خضراء على شواطئ جزيرة الزبرجد، ولقوا أكتر من 1500 عش للبيض في نفس السنة لسلاحف تانية.
السلحفاة صقرية المنقار
اسمها جاي من بقها اللي يشبه منقار الصقر، ممكن يوصل طولها لمتر واحد ووزنها لحوالي 80 كيلوجرام، ورغم إنها مهددة باللانقراض إلا إنها منتشرة على سواحل البحر الأحمر في مصر، زيّ خليج السويس وخليج العقبة اللي بتتواجد فيهم كتير.
ُتعتبر جزر البحر الأحمر أهم مناطق التعشيش للسلاحف الخضراء وصقرية المنقار، ومن الجزر دي؛ جزيرة الجفتون ووادي الجمال والزبرجد، وتواجد السلاحف دي عندنا بيلعب دور مهم جدًا في عملية التنوع البيولوجي والسلسلة الغذائية.
بتتغذى على إسفنج البحر اللي بيشكل أكتر من 75% من أكلها، وكمان بتتغذى على الطحالب وقناديل البحر وشقائق النعمان البحرية، وتقدر تاكل أنواع شديدة السمية من اللاسعات البحرية، زيّ رجل الحرب البرتغالي (نوع شديد السمية من قناديل البحر)، وبتقفل عنيها وهي بتاكل اللاسعات الخطرة دي علشان تحميها من السموم.
السلحفاة كبيرة الرأس
هي نوع من السلاحف اللي بتعيش في المحيط والمنتشرة في جميع أنحاء العالم، وموجودة على سواحل البحر الأحمر وعلى سواحل البحر المتوسط بشكل أكبر.
ممكن يوصل طولها لـ 90 سنتيمتر، أما متوسط وزنها فحوالي 135 كيلوجرام، وبتتغذى على النباتات البحرية، زيّ الطحالب والشعاب المرجانية الميتة والعوالق اللي بتعوم على سطح المياه، وكمان بتاكل اللافقاريات اللي بتعيش في قاع البحر زيّ الإسفنج.
السلحفاة جلدية الظهر
أضخم أنواع السلاحف البحرية وغير البحرية، وممكن يوصل طولها لاتنين متر ووزنها لـ 700 كيلوجرام، وتتميز بإن مالهاش صدفة وبيغطي ضهرها طبقة سميكة من الجلد، وتُعتبر غواص ممتاز فممكن تغطس لأعماق توصل لـ 1200 متر في الغطسة الواحدة لمدة توصل لـ 80 دقيقة. بتتغذى بشكل رئيسي على قناديل البحر وبتاكل منها 10 لـ 100 كيلوجرام كل يوم، وده بيلعب دول مهم جدًا في تأمين الشواطئ للاستخدام البشري.
في ديسمبر 2009، وفي مؤتمر الأمم المتحدة للمناخ في كوبنهاغن، تم وضع السلحفاة الجلدية على قائمة أكتر الأنواع المهددة بالانقراض بسبب الاحتباس الحراري العالمي.
أخر مرة تمت مشاهدتها كانت من 11 سنة في منطقة الغردقة، ولقوها ميتة في شباك الصيادين وتم تحنيطها، ولكن في شهر أبريل الماضي نشرت جريدة المصري اليوم خبر إن مجموعة من الغواصين في رحلة غوص داخل محمية وادي جمال جنوب مرسى علم بالبحر الأحمر سجلوا مشاهدة نادرة للسلحفاة جلدية الظهر.
