الأبحاث العلمية والدراسات والمحاولات لسه مستمرة ومش هتقف فيما يخص مرض السرطان سواء في طرق تشخيصه أو علاجه. ودايمًا في جديد في المجال واكتشافات واختراعات ممكن تساعد بشكل أو بأخر. ومن ضمن الاكتشافات الحديثة اللي تستحق الكلام عنها، السعودية دانا السليمان نجحت في ابتكار طريقة سهلة ورخيصة للكشف عن مرض السرطان مستوحي من فكرة الباركودز الموجودة على السلع التجارية. وأخدت بسبب الاكتشاف ده الجائزة العالمية “مبتكرون دون 35”.
الطريقة معتمدة على تشخيص المواد المتاحة فبتقوم بترجمة نتائج العينات السائلة زيّ البول والدم لأنماط سهلة للقراءة. لإنها بتبقى عبارة عن نقط بتظهر على الشريحة وبتسمح بتشخيص المرض. التقنية مستوحاة من الرموز الشريطية بتعتمد على الكشف عن الحمض الريبوزي النووي الميكروي الخاص بالسرطان في عينات المرضى. ومع كل نوع من المرض ده. بيحصل نوع من أنواع الاختلال لمجموعة كاملة من الرنا الميكروي وبالتالي هيخلق تعبير في دم المريض على نوع السرطان اللي بيعاني منه.
وبتحول تقنية تشخيص الباركود كميات الرنا الميكروي المختلفة في العينة لإشارات فلورية كل سطر منها بيعتبر مؤشر بيولوجي مختلف للسرطان وبتعطي معلومات مجمعة.
وفي حوار للمهندسة السعودية دانا السليمان قالت إنها استوحت الفكرة من دكتور لها كان في الجامعة بيقول إننا قريب هنقدر نفحص مرض السرطان وكإننا بنمسح رمز شريطي! وكان في اعتقادها إن ده هيحصل في المستقبل البعيد بس ماكانتش متخيلة إن ده هيبقى قريب أوي كده!
بتكمن أهمية الاختراع إن في العادي كان بيتم تشخيص المرض بأكتر من طريقة. وفي مراحل متأخرة وأحيانًا بتكون غير دقيقة وفي نفس الوقت مؤلمة، فالموضوع ده هيوفر وقت. وفكرة تبسيط طريقة الفحص وخفض تكلفتها هيخلي في فحوصات تتعمل على نطاق أوسع وهتسمح بمراقبة تطور الحالة ومدى استجابتها للعلاج.
