الشخص الضعيف والجبان بتعرفه من الطريقة بيتعامل بها في مواقف بتبان إنها مواقف قوة له، بس في الحقيقة بتبقى مواقف ضعف وبتبين قد إيه المحتل هو شخص جبان وضعيف وقوته كلها بتكمن في شوية الأسلحة اللي ماشي بها. وفي فيديو تم تداوله على مواقع التواصل الاجتماعي بيظهر لحظة اعتداء وضرب وسحل من قوات الاحتلال الإسرائيلي على الطفل الفلسطيني محمد العجلوني، طفل من ذوي الاحتياجات الخاصة. وهو في حالة ذعر شديدة ومش مستوعب إيه اللي بيحصل له!
الاحتلال كان بيحاول يعتقل الطفل ده ضمن سلسلة اعتقالات كتير بتحصل على حي الشيخ جراح في الفترة الأخيرة. وللأسف لسه مكملة وفي مواجهات يومية بينهم بس لسه أهل الحي صامدين!
لما بتعتدي على طفل ماعندوش نفس أسلحتك ولا في في قوتك البدنية ولا عنده القدرة الكافية إنه يدافع عن نفسه يبقى أنت جبان!
الخبر ده جيه بالتزامن مع إعلان دولة البحرين والقائم بأعمال وزير الخارجية البحريني عبد الله آل خليفة وبحضور وزير جيش الاحتلال بيني غانتس عن تعاون وإلحاق ظابط إسرائيلي في البحرين. وده على حسب ما اتقال إنه ضمن “العلاقات الثنائية ومسار التعاون المشترك وسبل دعمه وتنميته في مختلف المجالات، في إطار إعلان تأييد السلام”
وبتعتبر دي المرة الأولى اللي بيتم فيها تعيين مسئول رفيع في جيش الاحتلال الإسرائيلي في منصب رسمي داخل دولة عربية!
مش أول مرة هنكتب عن الانتهاكات اللي بيتعرض لها الشعب الفلسطيني من جيش الاحتلال ومش هتبقى آخر مرة، هيفضل كل العالم يكتب ويسجل كل اللحظات علشان التاريخ يشهد. واللي مش مصدق يصدق إن ده التصرف الطبيعي لمغتصب الأرض والمحتل، هو ده السلاح الوحيد اللي في إيده وماعندوش غيره. سلاح خايب وضعيف وبيوضح قد إيه إنك فاقد قدرتك وقوتك من زمان قدام الشعب ده! لكن الشعب الفلسطيني عنده سلاح أقوى وهو الإيمان بالأرض وإن الحق هيرجع لصاحبه ولو عدى 70 سنة تاني.
