بجو مميز في الغردقة: احتفالات مختلفة من الوزارة باليوم العالمي للسياحة
احتفال وزارة السياحة والأثار السنة دي بيوم السياحة العالمي كان حقيقي احتفال مميز ومختلف، من أول يوم في شهر سبتمبر، وعلى مدار 27 يوم، كان بيتم نشر أفلام قصيرة كل يوم عن محافظة مختلفة من الـ 27 محافظة مصرية، بنحتفل بالتنوع اللي بتتمتع بيه بلدنا، بالتاريخ، الحضارة، الفن، الغناء، الموسيقى، الشمس، المياه الفيروزية، والحاجات اللي بتميز كل محافظة عن التانية.
امبارح، تم الاحتفال بيوم السياحة العالمي اللي بيوافق 27 سبتمبر، في محافظة الغردقة، بشمسها الدافية، مع 120 فنان مصري وأجنبي. في حدث هو الأول في سلسلة من الفعاليات الترويجية اللي بيتم تنظيمها الفترة اللي جاية، بالإضافة لسلسلة تانية بالتعاون مع الاتحاد المصري للغرف السياحية والمستثمرين السياحيين، كجزء من استراتيجية الترويج الجديدة للوزارة.

الاحتفالية في الغردقة تضمنت عدد من العروض المختلفة، بحضور وزير السياحة الدكتور خالد العناني، ومحافظ البحر الأحمر اللواء عمرو حنفي، فيها عرض أعمال الفنانين المشاركين، بالإضافة لمجسم تشكيلي تحت اسم هرم السياحة والفنون، كان مجسم ضخم تم إهدائه للمحافظة علشان يكون أحد المعالم الحضارية فيها ويكون ذكرى للحدث الفني الضخم اللي حصل في يوم السياحة العالمي فيها السنة دي وكان تحت شعار “السياحة من أجل تحقيق نمو شامل”
وزير السياحة في أثناء إلقاء كلمته خلال الاحتفالية قال إن مصر بتفتح ذراعيها لكافة السائحين من خلال الشمس الدافئة، وإجراءات احترازية آمنة بيتم تطبيقها على أكمل وجه، وأكد على إن مصر تبنت حملة ترويجية من بداية السنة، وهي التعبير عن الحياة في مصر وإن مصر حية، وده من خلال إقامة العديد من المهرجانات والفنون والكرنفالات والأنشطة البحرية وغيرها.