أقام معرض حديث الفن (ArtTalks) أمس الأحد 15 مايو، عرض يحتفي بلوحات الفنان المصري-اللبناني-الكرواتي نيشا سورسوك، في أول عروضه الفنية في مصر.
بيقدم سورسوك رؤية ساخرة وشديدة الفنية للعالم من خلال تلات سلاسل من اللوحات المزدحمة بالتفاصيل، في مزيج بديع بين الجرافيتي والكاريكاتور وفن البوستر، في السلسلة الأولى (مدن أملكها – My Cities) بيستكشف الفنان مدن العالم الحديث بتفاصيلها الخلابة وتناقضاتها الجميلة.
أما السلسلة التانية، فبيستكشف فيها سورسوك أعظم الأعمال الفنية القديمة (Grand Masters)، وفي العالم القديم (History of the World) بيرجع بالزمن ويفكك التاريخ بعين مراقب بيعيش الماضي.
بيقول لنا سورسوك عن سلسلة تاريخ العالم: “في رحلة استكشاف تاريخ العالم، كان لازم أعمل بحث دقيق عن كل حقبة زمنية.. في مصر القديمة مثلًا، كان في حيوانات مش موجودة حاليًا، وبالتالي كان لازم أفهمها علشان أعرف أنقل صورة واضحة للحقبة الزمنية دي”.
في كل لوحة، تقدر تشوف كمية ضخمة من التفاصيل في امتزاج فني بيحولها لقطعة واحدة متجانسة، وكل ما تبص أكتر كل ما تكتشف تفاصيل أكتر، وفي كل لوحة تقدر تميز فنانين وشخصيات عامة من حقب زمنية مختلفة، يحتفي نيشا بهم جميعًا.
الشاهد اللي شاف كل حاجة، نيشا سورسوك، موجود في في كل لوحة أحيانًا كملك أو كعمل فني لفنان ما، أو حتى كشخص مهمش في زاوية صغيرة من اللوحة، وجود بيحول المعرض إلى لعبة مسلية من البحث عن نيشا في لوحاته.
