خبر صادم جدًا فضل ينتشر على السوشيال ميديا من إمبارح إن طبيبة في مستشفى أشمون في محافظة المنوفية ارتكبت جريمة شنيعة في أول يوم رمضان، وولعت النار في طليقها بعد خلاف على التمكين من شقة الزوجية.
وقال الخبر اللي نشرته صفحة تحيا مصر على السوشيال ميديا، إن الطبيبة تعمدت إشعال النار في طليقها بسبب نزاع على شقة الزوجية اللي كان طليقها بيجهزها علشان يستقبل فيها زوجته الجديدة.
الرأي والرأي الآخر في قضية طبيبة أشمون
تعددت الآراء بخصوص الخبر ده، وفي ناس شافت إن طبيبة أشمون بطلة علشان قدرت تدافع عن حقها وتنتقم من طليقها، وانطلقت الآراء دي ناحية توقعات عن علاقتهم وإنه كان زوج ظالم، وبالتالي يستاهل اللي حصله.
وبدأت الناس تعمل ميمز عن الحادثة وتقول إنه يستاهل، بس المانع الوحيد عندهم إن اللي حصل ده كان ممكن يستنى لبعد رمضان، وناس قالت ربنا يديها الصحة والعافية وإنها عملت الواجب عمله.
في ناس تانية اختلفت تمامًا مع الآراء دي وكانت شايفة إن اللي حصل ده مش مضحك خالص وماينفعش يكون مادة للهزار والميمز، وناس قالت إن الفرحانين باللي حصل ده ماعندهمش أدنى درجات الرحمة والشفقة، وقارنوا ما بين اللي حصل ده لو كان حصل بالعكس من واحد لطليقته كانت هيكون رد فعل الناس إيه.
التصدي لخطاب العنف على السوشيال ميديا
هاجمت الصفحة في بوستها كل الناس اللي خدت الموضوع بشكل كوميدي أو اللي دعموا الجريمة دي بمبررات مختلفة، وأكدت الصفحة إن العنف مش مقبول خالص في التعامل مع أي مشكلة، وإن مشاكل الجواز ممكن تتحل ببساطة بالطلاق، لكن العنف والجريمة غير مقبولين بأي شكل من الأشكال.
كتبت صفحة Speakup على الإنستجرام: ” العنف والتعدي على الغير مش مقبول أيًا كانت مبرراته، وأيًا كان نوع الشخص اللي بيعمله؛ والسخرية من الأذى مش شيء كوميدي ولا ينفع يتاخد بهزار.
والستات اللي بتشوف إن لو حد خان التاني أو اتجوز على مراته عادي يتأذي، ما يفرقوش حاجة عن اللي بيبرروا جرايم الشرف. أي مشكلة بين شخصين متجوزين ممكن تنتهي بالطلاق. ولو مش متجوزين – زي الخبر سواء كان حقيقي أو لأ – فهي بالتأكيد جريمة وما ينفعش تتاخد بشكل كوميدي!”.
بيان الخيط الأبيض من الخيط الأسود في حادث طبيبة أشمون
بعد بحث، اكتشفنا إن الخبر المنتشر على السوشيال ميديا مش مظبوط، وكتبت صدى البلد عن التقرير الرسمي اللي سجلته النيابة بخصوص الحادثة دي وكان كالآتي:
بدأت أخبار الحادثة تنتشر بعد ما وصل لمديرية أمن المنوفية بلاغ من مستشفى أشمون العام بوجود مدرس في واحدة من مدارس أشمون، وصل للمستشفى بحروق شديدة في أنحاء مختلفة من الجسم.
وخلال التحقيق مع الضحية وضح إنه كان بيجهز الشقة اللي كانت قبل الطلاق شقة الزوجية بتاعته هو وطليقته، وكان بيستعد علشان يستقبل زوجته الجديدة، وفي أول يوم من أيام رمضان راح له أخو طليقته علشان يتفاهم معاه بخصوص أحقية الملكية في الشقة للزوجة، لكن اشتد ما بينهم النقاش لدرجة عنيفة وحصل إن أخو الطبيبة كب على الضحية مادة التنر وولع فيه النار.
ونص المحضر الرسمي من النيابة إن الضحية اللي وصل للمستشفى بحروق شديدة في جسمه كان بيجهز شقة الزوجية اللي عليها أحكام قضائية وقرار بالتمكين من طليقته، علشان يتجوز فيها زوجته التانية، فبعتت طليقته أخوها ومعاه ناس تانية علشان ياخدوا منه الشقة، فاختلفوا مع الضحية واتخانقوا لحد ما أخو طليقته وولع فيه النار، وبكده تم تحرير محضر باللي حصل ولسه النيابة مستمرة في تحقيقاتها.
