أعلنت وزارة التضامن الاجتماعي عن تكليف دفعة جديدة بالخدمة العامة، وهي الدفعة 95 من خريجي الكليات والمعاهد اللي بيحملوا الجنسية المصرية من الإناث، والذكور اللي تم إعفائهم من الخدمة العسكرية بشرط مرور 3 سنين من تاريخ وضعهم تحت الطلب. وده هيكون لمدة سنة في مجالات مختلفة بتشمل المجالات الاجتماعية، و القطاعات والبرامج والمبادرات التابعة لوزارة التضامن الإجتماعي.
كل التفاصيل عن البرامج، وكيفية التقديم موجودة علي الموقع الرسمي لوزارة التضامن الاجتماعي، والبرامج والمجالات دي بتهدف لدمج الشباب في المجتمع، وزيادة التفاعل الاجتماعي للشباب، والاستفادة منهم بشكل خدمي للمجتمع، وتأهيلهم للحياه العملية في نفس الوقت اللي هيكتسبوا بيه مهارات جديدة هتساعدهم في سوق العمل.
التسجيل في الخدمة العامة للدفعة الجديدة هيبدأ بكرا (1 سبتمبر 2020)، والوزارة بتناشد الشباب اللي بتنطبق عليهم الشروط إنهم يتوجهوا لمكاتب الخدمة العامة الأقرب لمحل إقامتهم، ويقدموا مجموعة من المستندات، ويحددوا المجال اللي عايزين يخدموا فيه.
والمستندات المطلوبة للالتحاق هي
- صورتين من بطاقة الرقم القومي
- صورتين من المؤهل الدراسي
- 3 صور شخصية
- صورة من الموقف من التجنيد بالنسبة للذكور
وبالنسبة للأماكن اللي متاح تأدية الخدمة العامة فيها هي:
- برنامج تحسين الطفولة المبكرة: وده بيكون في الحضانات، وبيهدف لتحسين الجودة، والخدمة، والرقابة علي الحضانات بطرق علمية من خلال مجموعة من الألعاب للاطفال.
- برنامج موده: وده برنامج للحفاظ على كيان الأسرة المصرية من خلال دعم الشباب المقبل علي الجواز بالمعارف والخبرات اللي هيحتاجوها لتكوين أسرة، و بيهدف البرنامج للحد من ارتفاع نسب الطلاق.
- برنامج رفيق المسن: البرنامج ده بيهدف لتقديم الرعايه الصحية، والاجتماعية للمسنين في بيوتهم، ومن ناحية تانية بيتم تأهيل المرافق نفسه وتعليمه كيفية العناية بالمسنين.
- حملة اتنين كفاية: و دي هدفها الحد من الزيادة السكانية، ودعم مفهوم الأسرة الصغيرة.
