مشروع تطوير الأسواق العشوائية هو واحد من أهم المشروعات اللي شغال عليها صندوق تطوير العشوائيات خلال الفترة دي، وده استكمال لمشروعات تطوير المناطق العشوائية وغير الآمنة، بتكلفة تقديرية 44 مليار جنيه.
وفي اجتماع لجنة الإدارة المحلية في مجلس النواب، قرروا مناقشة وحسم مصير ملف المناطق العشوائية، وده الاجتماع اللي حضره وزير التنمية المحلية، اللواء محمود شعراوي.. وهنفهم مع بعض خطة تطوير الأسواق العشوائية وليه تم اتخاذ القرار ده، والخطوات بتاعة المشروع ده.
عندنا كام سوق عشوائي؟ وإيه اللي تم تطويره فعلًا؟
وزارة التنمية المحلية كانت أعلنت قبل كده عن جهود لتطوير كل الأسواق الرسمية، ومنها العشوائية، في المحافظات المختلفة. وقامت الوزارة بحصر لعدد الأسواق العشوائية في كل المحافظات ووصل عددها 1792 سوق، وتم تطوير 105 سوق وإزالة 83 سوق، وجاري تطوير 345 سوق، وتم نقل 12 سوق لأماكن تانية. أما عدد الأسواق الرسمية، فوصل ل626 سوق، وتم تطوير 137، وجاري تطوير 202 سوق.
كلام وزير التنمية المحلية
الوزير قال في الاجتماع اللي أشرنا له إن الحكومة حريصة على القضاء على الأسواق العشوائية وإن القيادة السياسية حريصة على ده بالتزامن مع برنامج حياة كريمة، وأضاف إن الرئيس عبدالفتاح السيسي كلف بتوفير أماكن للبياعين قبل ما يسيبوا أماكنهم وقبل إنهاء مشكلة الأسواق العشوائية.
الأسواق الغير عشوائية عاملة ازاي؟
جهزت وزارة التنمية المحلية نماذج لتطوير الأسواق دي وشكلها واللي هيميزها؛ مساحات مناسبة ومفتوحة، توفير كل المرافق والخدمات الأمنية والحماية المدنية والخدمات البيئية زيّ شركات النظافة، ده بجانب وجود رقابة تموينية. وهيتم تحديد سعر مناسب للمستأجرين، اللي هيكون مصدر دخل للوحدات المحلية، واللي هيُستخدم بعد كده في توفير خدمات للمواطنين.
ليه ده مهم لينا؟
دايماً كانت الحكومات المتعاقبة بتحط خطط لإنهاء أزمة الأسواق بعد زحف البياعين المتجولين في كل الشوارع، واللي احتلوا كمان بعض المناطق الحيوية، وأقاموا الأسواق اللي انعدمت فيها وسائل الأمان وسببت فوضى ومظاهر غير حضارية، ده بالإضافة لبيع سلع أغلبها مجهولة المصدر. كل الأسباب دي هي اللي دفعت المسئولين لإنشاء أسواق حضارية تتكفل بتوفير مكان آدمي للبياعين الجائلين.
