ماهينور أكتر سؤال بت تسأله هو معني اسمك إيه، إجابة السؤال دا هو إن اسمها معناه ضوء القمر، وهي مش بتحب حد يناديها بأي حاجة غير ماهي.
ماهي من وهي صغيرة بتحب تتناقش في قضية المرأة والمشاكل المجتمعية والأحداث السياسية ودا كان من الأسباب اللي دخلها اقتصاد وعلوم سياسية في الجامعة، ولكن السبب الرئيسي هو إن ماهي مقتنعة إنها عندها القدرة في تغيير العالم للأحسن. ولحبها للموسيقى والغنى بتحاول ماهي إنها تعلم نفسها عزف الجيتار وبتحاول تسترجع ذكرياتها عن لعب البيانو. وطبعاً غير الأكل طول الوقت والنوم لمدة ٢٥ ساعة في اليوم، بتحب ماهي إنها تتفرج على مسلسلات الخيال العلمي بتاعت نيتفليكس اللي لحست مخها وعشان كدة هتلاقي ماهي مستنية الزومبيز والفضائيين يجوا يحتلوا الكوكب الأرض، وحالياً ماهي مقتنعة أنها فامبير بيعرف يمشي في الشمس.
