من المتوقع نزول أمطار غزيرة قد تصل لحد السيول من النهارده لحد يوم السبت في مصر، وبما إن نزول المطر مش بيحصل كتير زيّ الدول اللي بيغلب عليها السقعة والمطر، فطريقة تعامل المصريين مع المطر بتبقى مختلفة إلى حد ما.. فبتنقسم الناس من حيث تعاملهم مع نزول المطر لأنواع كلنا عارفينهم وبنشوفهم على السوشيال ميديا وكمان في حياتنا اليومية.
اللي بيلبس كل الدولاب
نزول المطر مش بالضرورة معناها إن يكون الجو برد أوي أو رياح مثلًا، ولكن هتلاقي برضه صاحبك أو جارك اللي معروف إن من أول الدنيا ما تبدأ تندع، بيدخل على أوضته ويلبس نص هدومه والشراب المتين اللي بيتلبس في بلاد الإسكيمو، ومابيخرجش من أوضته إلا لما المطرة تقف خالص، أصحابنا اللي بيعملوا كده هتوحشونا من دلوقتي!
اللي بيصور فيديوهات عميقة
أول ما الدنيا بتمطر، كتير مننا بيجري على المطبخ يلحق يعمل القهوة علشان يحطها على ترابيزة البلكونة وجنبها كتاب، وطبعًا الربط بين أغاني فيروز اللي مش عارفين لحد دلوقتي جيه منين (ولكننا بنحبه جدًا) بيخلي الفيديو اللي بيتم تحضيره يكتمل بأغنية لفيروز شغالة في الخلفية كده، والستوري دي هتشوف منها كتير أوي في أي يوم مطرة في مصر.. وبالمناسبة إحنا مش بنتفه من ده أبدًا، فإحنا بنقّدر تمامًا فكرة إن الشخص يعمل كل حاجة تجيبله سعادة، طالما ده مش بيأذي الآخرين.
الأمهات المذعورة
طبعًا لإن طبيعة الأم الحب والخوف المفرط على أولادها، ففي أمهات بمجرد بدأ نزول المطر بيجيلهم حالة “panic” فبيتصلوا بأولادهم علشان يرجعوا من الخروجة، بيمنعوهم من النزول 3 أيام على الأقل وبيجبروهم على النزول تحت البطانية وأكل 3 كيلو برتقان.. وطبعًا الـ panic على الغسيل المنشور قصة تانية.. بنحب أمهاتنا وبنقدر خوفهم علينا حتى لو بيبقى مبالغ فيه شوية وقت نزول المطر.
خناقات محبين الشتا والصيف على الفيسبوك
لو انت مش من النوع اللي بيصور فيديوهات للمطر، يبقى ممكن تكون من الناس اللي بيدخلوا يكتبوا عنه على السوشيال ميديا سواء بالخير أو بالشر! فالناس اللي من فريق الصيف بيبدأوا يتكلموا عن كآبة الجو ويسألوا أسئلة وجودية زيّ كان هيحصل إيه لو طول الوقت الدنيا صيف، أو إن إزاي في ناس أصلًا بيحبوا الشتا.. وبعد خمس دقائق بنلاقي فريق الشتا ظهر ودافع باستماته عن الجو، اللي لو حتى قلب جليد برضه هيفضلوا يحبوه أكتر من الشتا! اعترف وقولنا انت بتبقى تبع أنهي فريق فيهم.. كل الآراء تُحترم!
اللي بينزل الشارع مخصوص وبياخد برد
بين كل الناس اللي اتكلمنا عنهم فوق، فاللي بيحبوا المطر الحقيقي، هو اللي مستعد ياخد برد ويتعب بسببه! ففي عشاق المطر اللي حرفيًا فوسط ما الناس بتبقى بتجري علشان تستخبى من السيول والأمطار الغزيرة، بيكون هو بيجري ناحية المطرة وممكن كمان يرقص عليها!
آخر كلمة: انت أنهي نوع من اللي اتكلمنا عنهم؟ شاركنا رأيك في التعليقات!
