الأسبوع اللي فات رحل عن عالمنا الإعلامي الكبير وائل الإبراشي. وهو قيمة وقامة وعلم من أعلام الإعلام المصري وخبر الوفاة أثار حزن كبير. وفي نفس الوقت حصل جدل كبير ومفاجأة صادمة خصوصًا عند المقربين. لإنه كان من المتوقع إنه يرجع تاني لحياته الطبيعية بعد ما قالوا إنه بدأ يتماثل للشفاء.
بعد وفاته انتشر خبر بإن أرملة الراحل قدمت بلاغ رسمي للنائب العام بتتهم فيه الطبيب المعالج بقتل الإبراشي .وبتهمة الإهمال الطبي وإعطائه أدوية غير مناسبة له. وفي نص البلاغ اللي قدمه الدكتور سمير صبري بصفته محامي ووكيل زوجة الإبراشي قال ” إن الطبيب اغتال المرحوم وإنها جريمة قتل مكتملة الأركان ومع سبق الإصرار والترصد. لإنه خدع المرحوم بأقراص سحرية اكتشفها لمعالجة كوفيد وإنه هيعالجه بيها في البيت. وإن الدكتور كتب أعجب روشتة في تاريخ الطب من وقت جائحة كورونا وإن الجرعة دي مالهاش اسم لإنها اختراعه!”
وتابع في نص البلاغ”إن بدأت حالة وائل الإبراشي في التدهور وأرقام ونتائج التحاليل بدأت تطلع بشكل جنوني في إشارة إن فيه التهاب واضح في الرئة. وبداية لعاصفة السيتكوين اللي ممكن تكون نهايته لو مادخلش مستشفى الصدرية في أسرع وقت. بس الدكتور أصر إنه يكمل في علاجه المزيف. ونتايج التحاليل كانت أرقامها مرعبة وده كان أكبر دليل على إن الفشل التنفسي لازم يحصل.
وأضاف على كلامه “إن الدكتور المعالج كان ملازم للإعلامي وائل الإبراشي طول الفترة دي ليل ونهار. وبيدخن بشراهة في نفس الأوضة اللي كان فيها وائل ومامتنعش عن ده برغم إنه عارف إن ده خطر عليه”. وكل ده بجانب العلاج الخرافي اللي أدى لتليف الرئة وعمل مضاعفات ماقدرش أي دكتور تاني إنه يحلها.
رد الدكتور على الاتهامات دي كان إيه ؟
خرج للإعلام علشان يرد على الاتهامات دي وقال “إن ماكنش فيه خطأ طبي من بداية رحلة العلاج .وإنه بيلتمس العذر لزوجة الإعلامي لإنها مش طبيبة. وإن هو اللي بيسارع علشان يتم فتح التحقيق معاه علشان يثبت برائته. ومعاه مايثبت كلامه إن الدوا اللي أخده وائل مصرح به ومن ضمن البروتوكول. وأضاف إن ماينفعش حد يتهمني بالإهمال من غير ما يتم التحقيق معايا.
بجانب الكلام ده صرح الطبيب المعالج وهو في مداخلة هاتفية مع عمر أديب إن المريض أخد عقار سوفالدي( بيستخدم لعلاج مرضى فيروس سي) برغم إن ده مش من ضمن البروتوكول المتفق عليه في مصر. بس هو رد وقال إن العقار ده فعال ضد الفيروسات. وفيه أبحاث علمية بتثبت الكلام ده وبتثبت إنه مالوش أي أعراض جانبية… التحقيقات لسه ماظهرتش حاجة بس مستنيين الحقيقة تبان!
