هل محتاج تسجل على موقع وزارة الصحة علشان تتلقى الجرعة المعززة من لقاح فيروس كورونا زيّ ما حصل في الجرعات الأولى؟ فين أماكن تلقيها؟ والمفروض ناخدها بعد قد إيه من الجرعة الثانية؟ مين ليهم الأولولية في الحصول عليها؟ إيه أصلًا أهميتها أو ضروريتها دلوقتي؟ كل دي أسئلة بتدور في دماغنا من أول ما عرفنا عن وجود جرعة ثالثة معززة من لقاح فيروس كورونا بكل أنواعه وإنها متاحة دلوقتي في مصر، علشان كده حاولنا نلاقي إجابات لكل الأسئلة دي.
وزارة الصحة أعلنت إن في خلال أيام هيتم تفعيل خطة للتطعيم بجرعة ثالثة معززة من اللقاحات المضادة لفيروس كورونا، والمتحدث الرسمي الدكتور حسام عبدالغفار وضح إن الفئات اللي هيتم تطعيمها بالجرعة المعززة للمناعة، هتكون كبار السن وأصحاب الأمراض المزمنة والفئات الأكثر عرضة للعدوى زيّ العاملين في القطاع الطبي. والجرعة الثالثة هتكون بعد مرور 6 أشهر على تلقي الجرعة الثانية.
مستشار وزيرة الصحة لشئون تكنولوجيا المعلومات المهندس أيسم صلاح، صرح إن الجرعة الثالثة التنشيطية للقاح كورونا مش هتحتاج للتسجيل مرة ثانية على الموقع، لكن المواطنين المتسجلين من الفئات اللي تم ذكرها، هتوصل لهم رسالة على الموبايل بعد مرور 6 أشهر على تلقيهم الجرعة الثانية، علشان يتوجهوا لنفس المركز اللي حصلوا من خلاله على الجرعتين سابقًا، ويتلقوا فيه الجرعة المعززة. وفي حالة عدم استقبال الواطن للرسالة، يتصل بالخط الساخن 15335.
الأبحاث العلمية والدراسات أشارت للاحتياج لجرعة معززة علشان تحافظ على استدامة المستوى المناعي خصوصًا للأشخاص الأكثر عرضة للإصابة أو حدوث مضاعفات منها، وتوفير الجرعة الثالثة بشكل سريع ده لحماية أصحاب عوامل الخطورة من العدوى، والتطعيم بيها في غاية الأهمية لكنه كمان اختياري.
